Árið að baki

Iðan studdi vel við Sigfús Björgvin Hilmarsson, keppanda í málmsuðu. Hann hóf undirbúninginn af krafti í góðri aðstöðu í húsakynnum Iðunnar í Vatnagörðum.

Adam Stefánsson varð fyrsti bifvélavirkinn til að keppa fyrir hönd Íslands á mótinu og var valinn úr hópi framúrskarandi ungs fagfólks. Adam stóð sig frábærlega í krefjandi keppni þar sem reyndi á fjölbreytta færni í bílgreininni.

Iðan tók þátt á Mannauðsdeginum. Þar gafst kærkomið tækifæri til að kynna þjónustu fyrirtækisins og ræða um sí- og endurmenntun við stjórnendur í atvinnulífinu.

Síðar í október tók Iðan þátt í Iðnaðarsýningunni í Laugardalshöll. Þar áttu fulltrúar Iðunnar góð samtöl við fagfólk um símenntun, raunfærnimat og aðra þjónustu og tóku á móti góðum hugmyndum frá félagsfólki.

Í nóvember beindum við sjónum út fyrir landsteinana. Katla Þórudóttir sagði frá starfsnámi sínu á veitingastaðnum Aure í Kaupmannahöfn. Reynsla hennar færði í kastljósið þau tækifæri sem Erasmus+ getur opnað í alþjóðlegu starfsnámi.

Símenntun á Norðurlandi var í brennidepli í nóvember þegar fulltrúar iðngreina, kennarar og fagfólk komu saman á Akureyri. Þar var rætt um stöðu símenntunar og hlutverk Iðunnar fræðsluseturs á svæðinu.

Desember hófst á fræðslu úr heimi prentmiðla. Leiðtogi prent- og miðlunargreina sótti ráðstefnu í London og fundaði með forsvarsfólki bresks prentiðnaðar og Royal Mail um þróun prentgreina og stöðu markpósts.

Samstarf og fræðsla settu svip sinn á desember þegar Iðan og Garðyrkjuskólinn héldu námskeið um ræktun ávaxtatrjáa og berjarunna fyrir starfsfólk Reykjavíkurborgar.

Árið 2025 var kvatt með þökkum til félagsfólks, samstarfsaðila og allra þeirra sem fylgdu Iðunni að málum á árinu. Hefð er fyrir því að fá fagfólk í prentgreinum til samstarfs og var jólakortið hannað af Huldu Sól Magneudóttur, félagsmanni í GRAFÍU.

Á nýju ári var fjallað um tækifæri íslenskra fyrirtækja til að taka þátt í alþjóðlegu samstarfi og hvernig ný þekking og reynsla geta skilað sér aftur inn í reksturinn. Luiz Lobo, margverðlaunaður fréttamaður, heimsótti Iðuna og miðlaði sinni reynslu.

Fræðsla og fagleg forvitni voru áberandi í janúar þegar Michaela Müller-Kaya, framkvæmdastjóri Arcan í Þýskalandi, heimsótti Ísland og miðlaði sérþekkingu sinni á vatnsþéttingu steinsteyptra mannvirkja til íslensks fagfólks.

Janúar lauk með mikilvægum áfanga þegar fyrsta námskeið Öryggisskólans var sett á dagskrá. Með skólanum er lögð aukin áhersla á fræðslu sem stuðlar að öruggara starfsumhverfi.

Febrúar hófst með hátíð nýs fagfólks þegar 32 nýsveinar fengu viðurkenningu fyrir framúrskarandi árangur á sveinsprófi á Nýsveinahátíð IMFR. Á hátíðinni afhenti Ólafur Jónsson, forstöðumaður Nemastofu, viðurkenningar Bílapunktsins, Héðins og Snyrtistofunnar Garðatorgi fyrir að taka vel á móti starfsnemum.

Iðan og Veldix buðu upp á fræðandi og skemmtilega dagskrá í febrúar. Fagfólk í málmsuðu kom saman til að fræðast, ræða þróun greinarinnar og sækja sér innblástur.

Síðar í febrúar var kastljósinu beint að raunfærnimati og þeirri þekkingu sem fólk öðlast í starfi. Fagfólk deildi reynslu sinni og sýndi hvernig raunfærnimat getur stytt leiðina í námi.

Mars einkenndist af sýningunni Verk og vit þar sem Iðan hitti fjölda fagfólks, samstarfsaðila og gesta. Sýningin skapaði góðan vettvang fyrir samtöl, fræðslu og tengslamyndun.

Apríl markaði tímamót þegar Iðan fagnaði 20 ára afmæli sínu. Af því tilefni var félagsfólki boðið ókeypis vefnámskeið að eigin vali sem þakklætisvott fyrir samfylgdina og hvatning til áframhaldandi þekkingaröflunar.

Maí hófst á ferð um Vesturland þar sem leiðtogar Iðunnar heimsóttu fyrirtæki, kynntu starfsemina og ræddu við fagfólk um símenntun og þarfir atvinnulífsins á svæðinu.

Prent- og hönnunargreinarnar fengu sinn dag í maí þegar fagfólk fjölmennti á Snertipunkta: Dag prents og hönnunar. Kastljósinu var beint að styrkleikum prents í stafrænum heimi og því hvers vegna prentmiðlar halda áfram að skipta máli sem áhrifaríkur og áþreifanlegur snertipunktur.

Maí lauk með ferð austur á land. Þar heimsóttu leiðtogar Iðunnar fyrirtæki, kynntu starfsemina og ræddu beint við félagsfólk um símenntun og þarfir fagfólks á svæðinu.

Júní hófst með spennandi blöndu af eldri og nýrri bílatækni þegar rafvæðing eldri bíla var í brennidepli á námskeiðum Iðunnar og Electric Classic Cars. Þar fékk gamall Land Rover nýtt og rafknúið líf.